貪戀堅持揀擇
要當事業型女性，最大犧牲莫過於空虛寂寞，當時下女生都偏愛高唱《大女仔》，不再需要男人接濟時，也許，自立已成為新派女性指標之一，至少愛自己、滿足自己，才會找到愛我的人，相守一生。
「現在感情生活是『零』，今年大部分時間都在拍劇、開工，根本無時間找伴侶。你問我恨唔恨拍拖？總之緣分未到唔急得，只能夠一切隨緣，好彩屋企人明白事理，從來無逼過我。」
講心唔講金
超過三十歲的女人，大抵已被認定做「老姑婆」，為了除去這個不討好的名字，大部分人會不惜一切找尋另一半，但宣萱卻大表反對，堅持追求完美的戀愛態度。
「『老姑婆』這個名無話鍾唔鍾意，天注定要你做亦無可奈何，我唔介意永遠靠自己、唔靠男人。因為驚而求其次女仔好傻，我唔認為女人成功會令男人卻步，其實兩個人一齊唔一定要講錢，即使對方賺錢少過我亦唔介意，最重要是大家相處開心、夾得。」
貪靚拒演奸角
潮流興「賣奸」、「賣醜」，做演員當然不能一成不變，做慣靚女都要嘗試演壞人。多年來，宣萱都捨不下一個「靚」字，為了保持形象，她只挑討好角色來演。不過時移勢易，希望突破自己的宣萱表示，希望可以一嘗「奸角」的滋味。
「我從未做過壞人，只係好多年前拍過一部單元劇《驚心都市》時演過一次，當時演技生硬，連自己都唔敢翻睇。現在累積十四年演戲經驗，唔敢話一定做得好，但總比以前有信心，更唔擔心形象受損，因為依家觀眾好明白事理，即使被人鬧都係讚我演技好，我會好開心。」
月曆顯身價
拍劇好與醜，觀眾都可以接受，但影月曆靚相，能夥拍靚仔靚女一齊影，才能顯出身價。早前宣萱飛赴泰國拍攝無線一年一度的月曆，被安排與兩位視帝鄭嘉穎、郭晉安和當家花旦佘詩曼合作，外間更傳無線高層樂易玲有心偏幫宣萱，宣萱當然例牌否認：「TVB唔係刻意偏幫，聽講我原本唔係呢個組合，據我所知只係部分藝人檔期問題，所以我未同他們合作過都被編成一組。」
心水帝后
無線台慶已進入白熱化階段，大眾最關心當然是「視帝」、「視后」花落誰家？而宣萱亦有她心水之選：
宣萱眼中的「最佳男主角」：劉松仁
宣萱：「我同松哥《歲月風雲》中飾演父女，好開心有這樣緣分，我覺得他拍劇好專業、好勤力，能夠帶到我們這班後輩入戲，工作以外亦有好玩一面，非常難得。」
宣萱眼中的「最佳女主角」：鄧萃雯
宣萱：「除了自己之外，其實一直好欣賞雯女，雖然《歲》劇裡面同雯女唔係太多對手戲，但發現佢拍劇真係好認真，雖然已經係實力派，但仍會花好多時間同其他演員溝通，未正式拍已捉住Toby（梁靖琪）、三哥（苗僑偉）研究點做，加上佢可塑性好高，做高貴有錢女人可以、扮師奶一樣很行。」
http://img254.imageshack.us/img254/1704/lovetvb1104enew30b1sv9.jpg
宣萱對視后虎視眈眈，希望今年能再下一城奪魁。
☆。╮TVB港劇迷～之家╭。☆ 整理！轉載必註明！
